Media shtetërore iraniane raportoi se një memorandum mirëkuptimi i propozuar me Shtetet e Bashkuara përfshinte lirimin e 12 miliardë dollarëve në asete të ngrira.

Raporti citoi një draft “jozyrtar”, ndërsa një artikull i ngjashëm i transmetuar më herët këtë javë u hodh poshtë nga Shtëpia e Bardhë si një “fabrikim”. 

Presidenti amerikan Donald Trump një ditë më parë kishte dhënë përshkrimin e tij të një marrëveshjeje të mundshme për ndalimin e luftës mes dy vendeve, por elementët kryesorë u kundërshtuan nga burimet iraniane.

Trump kishte theksuar se “nuk do të shkëmbehen para, deri në njoftim të mëtejshëm”, ndërsa raportet iraniane pretenduan se SHBA-të do t’i jepnin Iranit akses të plotë në fondet brenda 60 ditëve.  

Sipas mediave iraniane, delegacioni i Teheranit, ku përfshihej edhe kreu i bankës qendrore, vizitoi Katarin për të diskutuar çështjen e fondeve të ngrira si pjesë e një marrëveshjeje përfundimtare.

Raporti shtoi se Irani do të vazhdonte të menaxhonte Ngushticën e Hormuzit, e cila është bllokuar që nga fillimi i konfliktit, duke trazuar tregjet globale. 

Nga ana tjetër, Trump kishte deklaruar se Irani do ta rihapte ngushticën “për trafik të pakufizuar detar”, ndërsa SHBA-të e kanë cilësuar të papranueshme që Teherani të mbajë kontrollin mbi këtë kanal jetësor për dërgesat e energjisë.