Presidenti Donald Trump dhe shoqërues të tij, mbërritën në Pekin për dy ditë bisedimesh të profilit të lartë me Presidentin kinez Xi Jinping, pak para orës 20:00 (ora lokale), në një kohë trazirash të forta gjeopolitike dhe tensionesh në rritje midis dy ekonomive më të mëdha në botë.

Mbërritja e Trump, e cila përfshiu një ngritje dhe shkundje grushti para se të zbriste nga avioni, u shënua nga pompoziteti dhe ceremonia që presidenti amerikan tradicionalisht i vlerëson.

Ai u prit në aeroport nga zëvendëspresidenti kinez Han Zheng (i cili shihet gjerësisht si i dërguari diplomatik i Xi dhe mori pjesë në inaugurimin e Trump si president vitin e kaluar), si dhe zyrtarë të lartë kinezë dhe amerikanë.

Midis tyre ishin ambasadori i SHBA-së në Kinë, David Perdue, ambasadori kinez në Shtetet e Bashkuara, Xie Feng dhe zëvendësministri i jashtëm ekzekutiv kinez, Ma Zhaoxu.

Pas presidentit të SHBA-së, duke ecur në tapetin e kuq, ishin djali i tij Eric, nusja e tij Lara, drejtori ekzekutiv i Tesla-s, Elon Musk, dhe drejtori ekzekutiv i Nvidia-s, Jensen Huang, ndër të tjerë. Ceremonia e mirëseardhjes përfshinte një paradë ushtarake, një bandë ushtarake dhe rreth 300 të rinj kinezë me uniforma blu dhe të bardha, të cilët u rreshtuan përgjatë korridorit duke mbajtur flamuj kinezë dhe amerikanë.

Pritja zyrtare e Trump nga Xi Jinping është planifikuar për të enjten në mëngjes sipas kohës kineze. Bisedimet e dy udhëheqësve pritet të përqendrohen në marrëdhëniet tregtare SHBA-Kinë, konfrontimet teknologjike, çështjen e Tajvanit dhe luftën me Iranin, e cila ndikon në tregjet globale të energjisë dhe ekuilibrat e sigurisë në Azi dhe Lindjen e Mesme.