Presidenti amerikan, Donald Trump, ka lënë të hapur mundësinë për një raund të ri bisedimesh paqeje me Iranin brenda 48 orëve të ardhshme, duke sugjeruar madje kryeqytetin e Pakistan, Islamabadin, si një vend të mundshëm për zhvillimin e tyre.

Në një intervistë telefonike për The New York Post, Trump deklaroi se negociatat “po ecin përpara, por me një ritëm disi të ngadaltë”. Fillimisht ai la të kuptohej se takimi mund të zhvillohej në Europë, por më pas u shpreh më konkret duke theksuar se “diçka mund të ndodhë në dy ditët e ardhshme”, ndërsa Islamabadi po fiton gjithnjë e më shumë terren si opsion.

Trump vlerësoi gjithashtu kreun e forcave të armatosura pakistaneze, Asim Munir, të cilin e cilësoi “fantastik” dhe një faktor kyç në organizimin e bisedimeve, duke nënvizuar edhe marrëdhënien e tyre të afërt.

Në të njëjtën kohë, presidenti amerikan shprehu pakënaqësi ndaj raportimeve se SHBA-të i kanë propozuar Iranit pezullimin e programit të pasurimit të uraniumit për 20 vite. “Unë vazhdoj të them se ata nuk mund të kenë armë bërthamore”, theksoi ai, duke e konsideruar këtë afat të pamjaftueshëm.

Deklaratat e Trump vijnë në një moment të ndjeshëm për marrëdhëniet SHBA-Iran, ndërsa mbetet për t’u parë nëse raundi i ri i bisedimeve do të konkretizohet në ditët në vijim.