Agjencia amerikane për Bashkëpunimin në Sigurinë e Mbrojtjes (DSCA) ka zyrtarizuar marrëveshjen për një hua direkte prej 302 milionë dollarësh për Shqipërinë, në kuadër të programit të Financimit të Huaj Ushtarak (FMF).

Sipas njoftimit të DSCA-së, financimi synon të mbështesë modernizimin e Forcave të Armatosura shqiptare dhe rritjen e kapaciteteve të vendit për të kontribuar në sigurinë e përbashkët të NATO-s.

Marrëveshja është realizuar në bashkëpunim me Departamentin amerikan të Shtetit. Sipas autoriteteve amerikane, huaja do t’i mundësojë Shqipërisë financim me kosto të ulët dhe kushte fleksibël për zhvillimin e kapaciteteve mbrojtëse.

Fondet do të përdoren për pajisje dhe shërbime të prodhuara nga industria amerikane e mbrojtjes, duke synuar edhe rritjen e ndërveprueshmërisë së Forcave të Armatosura shqiptare me ato të aleatëve të NATO-s.

Pas publikimit të marrëveshjes ka reaguar edhe ministri i Mbrojtjes, Ermal Nufi, i cili e cilësoi financimin si një tjetër tregues të besimit të SHBA-ve ndaj Shqipërisë.

“Ky është më shumë se financim. Është besim, partneritet strategjik dhe investim në sigurinë e së ardhmes”, deklaroi Nufi.

Sipas ministrit, huaja prej 302 milionë dollarësh do të ndihmojë në modernizimin e Forcave të Armatosura dhe në rritjen e kontributit të Shqipërisë në sigurinë e përbashkët të NATO-s.

Postimi i Nufit

DSCA njofton lajmin e mirë për huanë direkte të Financimit të Huaj Ushtarak me Shtetet e Bashkuara.

Konfirmim edhe një herë i #SHBA i besimit të tyre te Shqipëria, te Aleanca jonë dhe te rruga që kemi zgjedhur për modernizimin e Forcave të Armatosura.

Marrëveshja për huanë direkte në kuadër të Financimit të Huaj Ushtarak (#FMF) është një investim i rëndësishëm në kapacitetet tona mbrojtëse dhe në aftësinë e Shqipërisë për të kontribuar edhe më shumë në sigurinë e përbashkët të NATO-s.

Nga Angazhimi i Hagës te NATO 3.0, Shqipëria po e kthen vizionin në kapacitete konkrete.

Ky është më shumë se financim. Është besim, partneritet strategjik dhe investim në sigurinë e së ardhmes.