Detaje të reja janë zbardhur nga ngjarja e rëndë e regjistruar mbrëmjen e kaluar në Lezhë, ku ish-kryetari i PD-së në njësinë administrative të Dajçit, në Zadrimë, është dhunuar brutalisht nga persona të paidentifikuar.

53-vjeçari Sokol Toma është goditur me sende të forta dhe, për shkak të plagëve të marra, është transportuar fillimisht për ndihmë mjekësore dhe më pas është dërguar në Spitalin e Traumës për trajtim më të specializuar.

Burime nga spitali bëjnë me dije se agresorët i kanë shkaktuar dëmtime të rënda fizike, duke i thyer këmbët dhe prerë një pjesë të veshit.

Aktualisht, 53-vjeçari ndodhet i shtruar në repartin e ortopedisë.

Ngjarja ka ndodhur rreth orës 22:00 në aksin Mamurras–Laç, në zonën e Sanxhakut.

Sipas të dhënave paraprake, autorët, të cilët dyshohet se kanë qenë të maskuar, e kanë sulmuar me sende të forta dhe më pas i kanë marrë edhe telefonin celular.

Policia ka nisur hetimet dhe po punon për identifikimin dhe kapjen e autorëve, ndërsa deri tani ende nuk dihen motivet e kësaj ngjarje të rëndë