Forcat ruse kanë pësuar një humbje neto territori gjatë muajit prill, për herë të parë që nga viti 2024, sipas një raporti të Institute for the Study of War (ISW).

Sipas të dhënave, Rusia ka humbur rreth 116 kilometra katrorë territore të pushtuara gjatë prillit 2026, duke shënuar një kthesë në ecurinë e luftës.

Raporti vlerëson se ky zhvillim reflekton një rënie të përgjithshme të vrullit sulmues rus, i cili ka qenë në rënie që prej nëntorit 2025.

Ndryshimi lidhet me një kombinim faktorësh, përfshirë kundërsulmet tokësore të Ukraine, goditjet e vazhdueshme ndaj linjave logjistike dhe infrastrukturës së komandës, si dhe ndërprerjet në sistemet e komunikimit rus.

ISW-ja thekson se forcat ruse po përballen me vështirësi në koordinim, të përkeqësuara nga kufizimet në përdorimin e platformave si Telegram dhe ndërprerjet e qasjes në sisteme komunikimi në zonat e pushtuara.

Gjithashtu, kushtet klimatike kanë ndikuar ndjeshëm në operacionet ushtarake, me dimrin e lagësht dhe terrenin me baltë që kanë kufizuar lëvizjen e njësive të mekanizuara.

Sipas raportit, ritmi i avancimit rus ka rënë ndjeshëm krahasuar me një vit më parë. Në periudhën nëntor 2025 – prill 2026, Rusia ka pushtuar rreth 1 mijë e 443 km², krahasuar me 2 mijë e 368 km² në të njëjtën periudhë një vit më parë.

Në muajt e parë të vitit 2026, avancimi mesatar ka qenë rreth 2.9 km² në ditë, shumë më pak se 9.76 km² në fillim të vitit 2025.

Raporti shton se forcat ruse po përdorin gjithnjë e më shumë taktika infiltrimi, duke dërguar njësi të vogla në zona të diskutueshme pa vendosur kontroll të qëndrueshëm.

Sipas ISW-së, këto taktika synojnë edhe të krijojnë perceptimin e një avancimi të vazhdueshëm në vijën e frontit.