Komisioni Evropian ka reaguar zyrtarisht ndaj goditjes ekonomike të shkaktuar nga konflikti në Lindjen e Mesme, duke lançuar një “Kornizë të Përkohshme” për ndihmën shtetërore. Ky mekanizëm, i cili do të qëndrojë në fuqi deri në fund të vitit 2026, u jep dritën jeshile qeverive të vendeve anëtare që të ndërhyjnë masivisht për të mbrojtur industritë dhe familjet nga rritja galopante e çmimeve.

Shifrat tronditëse të energjisë

Gjatë fjalës së saj në seancën plenare të Parlamentit Evropian në Strasburg, Presidentja e KE-së, Ursula von der Leyen, prezantoi një bilanc të rëndë financiar. Vetëm në dy muajt e parë të konfliktit, fatura e importeve të lëndëve djegëse fosile është rritur me 27 miliardë euro.

“Po humbasim pothuajse 500 milionë euro në ditë. Pasojat e këtij konflikti mund të ndihen për muaj ose edhe vite. Duhet të nxjerrim mësime: masat duhet të jenë të shënjestruara vetëm te më të prekurit, për të mos rënduar financat publike si në krizën e kaluar,” deklaroi Von der Leyen.

Ndihma deri në 70% për sektorët kyç

Korniza e re lejon shtetet anëtare të mbulojnë deri në 70% të kostove shtesë që lidhen me energjinë, karburantin dhe plehrat kimike. Sektorët që përfitojnë prioritet janë bujqësia dhe peshkimi; transporti; industritë me konsum të lartë energjie.

BE ka bërë të ditur se aktualisht janë ende 95 miliardë euro të disponueshme në buxhetin e energjisë, të cilat qeveritë duhet t’i përdorin me shpejtësi për të nxitur elektrifikimin e industrisë dhe ngrohjes.

Siguria në Ngushticën e Hormuzit dhe Irani

Përveç krizës energjetike, Von der Leyen adresoi edhe dimensionin gjeopolitik të luftës. Ajo theksoi se stabiliteti ekonomik i Evropës varet nga liria e lundrimit.

“Qëllimi ynë është fundi i përhershëm i luftës në Iran. Kjo përfshin rivendosjen e lirisë së plotë të lundrimit pa tarifa në Ngushticën e Hormuzit. Çdo marrëveshje paqeje duhet të adresojë gjithashtu programin bërthamor dhe atë të raketave balistike të Teheranit.”

Mbështetja për Ukrainën nuk ndalet

Pavarësisht krizës së re në Lindjen e Mesme, Presidentja e KE-së konfirmoi se ndihma për Kievin mbetet prioritet absolut. Brenda këtij tremujori, BE do të disbursojë këstin e parë prej 45 miliardë eurosh nga paketa totale prej 90 miliardësh.

Një pjesë e rëndësishme e këtij fondi, rreth 6 miliardë euro, do të shkojë ekskluzivisht për prodhimin e dronëve brenda Ukrainës, duke dërguar një mesazh të qartë se Evropa po dyfishon mbështetjen e saj ushtarake përballë agresionit rus.

Sa i përket sfidave të ardhshme, KE parashikon që deri në verë të prezantojë një Plan Veprimi për Elektrifikimin, i cili do të jetë jetik edhe për zhvillimin e shpejtë të Inteligjencës Artificiale dhe qendrave të të dhënave në mbarë kontinentin.