Një aksident me pasojë vdekjen ka ndodhur mëngjesin e kësaj të hëne në  Pikën Kufitare në Morinë, nga ku mësohet se ka humbur jetën një nga efektivët e Kosovës, Rexhep Zenel Gashi.

Lajmi i trishtë është bërë i ditur nga familjarët e tij të cilët kanë reaguar në rrjet duke ndarë detaje nga ngjarja.

Referuar një postimi të bërë në rrjet nga i afërmi i policit, Jakup Gashi shkruan se aksidenti i ndodhur në orët e para të mëngjesit i mori jetën policit njëherazi dhe veteranit të Ushtrisë Çlirimtare të Kosovës.

Paraprakisht raportohet se polici kishte dalë për të marrë ajër të pastër kur paprimtas është goditur nga një makinë, çka i ka shkaktuar atij vdekjen e menjëhershme.

Në lidhje me ngjarjen e rëndë ka reaguar dhe Policia e Kosovës e cila bën me dije se efektivi është goditur nga një shofer shtetas shqiptar, i cili është ndaluar.

Sipas Policisë mësohet se ngjarja e rëndë ka ndodhur rreth orës 02:40, kur është raportuar se polici është goditur nga një makinë që drejtohej nga një shtetas shqiptar, raportojnë mediat vendase.

Sakaq, trupi i viktimës është dërguar në Institutin e Mjekësisë Ligjore për të kryer kontrollet e nevojshme. Ndërsa bëhet me dije se po vijon puna për zbardhjen e plotë të rastit. 

“Në vendin e ngjarjes kanë dalë të gjitha njësitet relevante policore, ndërsa vdekja e viktimës është konstatuar nga mjeku kujdestar.Me vendim të prokurorit të shtetit, trupi i pajetë është dërguar në Institutin e Mjekësisë Ligjore për obduksion, ndërsa i dyshuari është dërguar në mbajtje”, sqaron Policia vendase.

Në lidhje me ceremoninë mortore, familjarët e policit bëjnë me dije se do të japin detaje në vijm.

Newsbomb.al i shpreh ngushëllime familjarëve, miqve dhe kolegëve të Rexhep Gashit për humbjen tragjike të njeriut të tyre.