Sekretari amerikan i Shtetit, Marco Rubio, ka deklaruar se Shtetet e Bashkuara po pezullojnë përkohësisht përpjekjet për ndërmjetësim në bisedimet e paqes mes Rusisë dhe Ukrainës, duke sinjalizuar një tërheqje të qartë nga roli aktiv diplomatik në këtë fazë të konfliktit.

Sipas Rubios, SHBA-të kanë qenë deri më tani i vetmi aktor që të dyja palët, si Moska ashtu edhe Kievi, kanë pranuar të komunikojnë në mënyrë të drejtpërdrejtë përmes saj, por këto përpjekje nuk kanë prodhuar rezultat konkret.

“Ne ishim të vetmit me të cilët si rusët ashtu edhe ukrainasit ishin të gatshëm të flisnin. Prandaj u përfshimë. Fatkeqësisht, nuk solli rezultate. Kjo është çështja”, deklaroi Rubio.

Ai shtoi se Washingtoni do të rikthehet në tryezën e negociatave vetëm nëse ndryshon dinamika e konfliktit dhe krijohen kushte të reja për progres real.

“Nëse dikush tjetër dëshiron ta marrë përsipër këtë rol – ju lutem, mirë se të vini”, u shpreh ai, duke lënë të kuptohet se SHBA-të nuk do të mbajnë më ekskluzivisht barrën e ndërmjetësimit.

Deklarata vjen në një moment të ngërçit të zgjatur diplomatik, ku përpjekjet ndërkombëtare për një zgjidhje të qëndrueshme të luftës në Ukrainë kanë mbetur pa rezultat konkret.