Policia e Lezhë ka reaguar lidhur me ngjarjen e ndodhur mbrëmjen e 9 majit 2026 në autostradën “Mamurras–Laç”, pranë kryqëzimit të Sanxhakut, ku biznesmeni i njohur, Sokol Toma u dhunua nga disa persona ende të paidentifikuar.

Policia sqaron se Toma, 53 vjeç është goditur me sende të forta nga disa persona, duke pësuar dëmtime në trup.

Menjëherë pas marrjes së njoftimit, në vendngjarje kanë mbërritur shërbimet e Policisë dhe grupi hetimor, të cilët kanë nisur veprimet për zbardhjen e plotë të ngjarjes.

Po ashtu policia thote se janë sekuestruar pamjet filmike të kamerave të sigurisë në një territor të gjerë, ndërsa po kryhen edhe veprime të tjera hetimore për identifikimin dhe kapjen e autorëve.

Kujtojmë se mediat kanë raportuar, se autorët i kanë thyer këmbët dhe i kanë prerë veshin.

Njoftimi i policisë:

Në lidhje me ngjarjen e ndodhur rreth orës 22:00 të datës 09.05.2026, në autostradën “Mamurras–Laç”, në afërsi të kryqëzimit të Sanxhakut, ku shtetas ende të paidentifikuar, kanë goditur me sende të forta, shtetasin S. T., 53 vjeç, banues në Lezhë, të cilit i kanë shkaktuar dëmtime në trup, sqarojmë se:

Menjëherë pas njoftimit, kanë shkuar në vendngjarje shërbimet e Policisë dhe grupi hetimor.

Grupi hetimor, në drejtimin e Prokurorisë, po vijon veprimet intensive, ka sekuestruar pamjet filmike të kamerave në një territor të gjerë, dhe po kryen një sërë veprimesh të tjera hetimore me qëllim zbardhjen e rrethanave, identifikimin dhe kapjen e autorëve.