Presidenti i FIFA-s, Gianni Infantino, është tërhequr nga plani i debatueshëm për të lejuar investitorë privatë të blinin aksione në kompeticionet e FIFA-s, pas reagimeve të forta nga komuniteti ndërkombëtar i futbollit.

Vetë Infantino deklaroi se projekti kishte krijuar përçarje dhe se, pavarësisht mbështetjes që mund të kishte, nuk ishte më në interes të objektivit fillestar.

UEFA e përshëndeti vendimin si “një fitore për të gjithë futbollin”, por theksoi se drejtimi aktual i FIFA-s ka humbur besimin e saj dhe të shumë anëtarëve të tjerë të familjes së futbollit. Organizmi europian akuzoi FIFA-n për mungesë transparence dhe “plane sekrete”, duke kërkuar reforma për të parandaluar përsëritjen e situatave të tilla.

Pak ditë më parë, UEFA kishte paralajmëruar bojkotin e të gjitha turneve të FIFA-s, përfshirë Kupën e Botës, nëse projekti nuk tërhiqej, duke deklaruar se “Kupa e Botës nuk është në shitje”.

Plani i Infantinos parashikonte krijimin e një kompanie tregtare që do të menaxhonte të drejtat televizive, sponsorizimet, biletat dhe aktivitetet mikpritëse të kompeticioneve të FIFA-s, ndërsa një pjesë e aksioneve do t’u shitej investitorëve privatë.

Projekti u kundërshtua edhe nga konfederatat e Azisë (AFC) dhe Amerikës së Veriut, Qendrore dhe Karaibeve (CONCACAF). Ndërkohë, këshilltari i lartë i Infantinos, Carlos Cordeiro, dha dorëheqjen në shenjë proteste, ndërsa drejtori operativ i FIFA-s, Kevin Lamour, e kritikoi planin duke e cilësuar “projektin e një personi”, që sipas tij kishte mashtruar edhe stafin e vetë FIFA-s