Aksident në aksin Peqin-Elbasan, plagoset një drejtues mjeti

Transmetuar më 28-08-2026, 17:28

Dy automjete janë përplasur në fshatin Lazarej. Njëri prej mjeteve ka pësuar dëmtime të rënda në pjesën e përparme, ndërsa drejtuesi i tij është transportuar për ndihmë mjekësore.

Një aksident rrugor është regjistruar mesditën e sotme në aksin kombëtar Peqin-Elbasan, ku dy automjete janë përplasur dhe një prej drejtuesve ka mbetur i plagosur.

Ngjarja ka ndodhur rreth mesditës në fshatin Lazarej, në Njësinë Administrative Përparim, në territorin e Bashkisë Peqin.

Përplasja ka qenë e fortë, ndërsa një prej automjeteve ka pësuar dëmtime të konsiderueshme në pjesën e përparme, e cila është shkatërruar pothuajse tërësisht.

Si pasojë e aksidentit, drejtuesi i njërit prej mjeteve ka mbetur i plagosur. Ai është transportuar për të marrë ndihmë mjekësore, ndërsa ende nuk ka të dhëna të plota për gjendjen e tij shëndetësore.

Në vendngjarje kanë mbërritur shërbimet e Policisë Rrugore, të cilat kanë nisur veprimet për dokumentimin e aksidentit dhe përcaktimin e shkaqeve të përplasjes.

Deri në këto momente nuk ka një informacion zyrtar për shkakun e aksidentit, numrin e personave që ndodheshin në automjete apo për persona të tjerë të dëmtuar.