NATO ka deklaruar se është e gatshme të përballet me çdo kërcënim, pas raportimeve se Irani po shqyrton mundësinë e sulmeve ndaj objektivave ushtarake amerikane në Europë, në rast se Presidenti amerikan Donald Trump vendos të përshkallëzojë konfliktin.

Një zyrtar i NATO-s deklaroi se qëndrimi i Aleancës në fushën e parandalimit dhe mbrojtjes mbetet “i fortë dhe efektiv”.

“Siç u dëshmua më herët këtë vit, kur sistemet e mbrojtjes së NATO-s kapën me sukses raketa balistike të lëshuara nga Irani dhe të drejtuara drejt Turqisë në katër raste të ndryshme, qëndrimi ynë në fushën e parandalimit dhe mbrojtjes është i fortë dhe efektiv”, tha zyrtari.

Deklarata vjen pas një raportimi të Financial Times, sipas të cilit Irani ka shqyrtuar mundësinë e goditjes së objektivave ushtarake amerikane në Europë nëse administrata Trump do të përshkallëzonte luftën. Sipas gazetës britanike, informacioni është bazuar në burime pranë regjimit iranian.

Raportimet flasin për objektiva amerikane në Europën Jugore dhe Juglindore, përfshirë pika në Bullgari dhe Qipro. Sipas burimeve të cituara nga Financial Times, Teherani po shqyrton edhe mundësinë e goditjes së infrastrukturës nënujore në ngushticën e Hormuzit.