Një gjykatë siriane ka dënuar me vdekje në mungesë ish-presidentin Bashar al-Assad, pasi e shpalli fajtor për krime lufte dhe krime kundër njerëzimit të kryera gjatë luftës civile siriane.

Vendimi është ndër më të rëndësishmit e marrë nga autoritetet e reja tranzitore të Sirisë ndaj figurave të regjimit të rrëzuar.

Bashar al-Assad nuk ishte i pranishëm në sallën e gjyqit. Ai dhe vëllai i tij, Maher al-Assad, u larguan nga Siria dhe shkuan në Rusi pasi rebelët hynë në Damask në dhjetor 2024 dhe i dhanë fund sundimit të familjes Assad.

Për shkak se ndodhet jashtë vendit, procesi ndaj ish-presidentit u zhvillua në mungesë.

Gjithashtu u dënua me vdekje edhe vëllai i vogël i al-Assad, Maher — gjithashtu në mungesë.

Lufta civile siriane, e cila zgjati rreth 14 vjet, shkaktoi rreth 500 mijë viktima dhe zhvendosi miliona njerëz.

Me vdekje dënohet edhe kushëriri i Assadit

Në të njëjtin proces, gjykata dha dënim me vdekje edhe ndaj Atef Najib, kushëririt nga nëna të Bashar al-Assadit.

Najib akuzohet se ka drejtuar shtypjen e protestave në Daraa, në jug të Sirisë, në vitin 2011. Protestat në këtë qytet u shndërruan në një kryengritje kombëtare dhe më pas në luftën civile që përfshiu të gjithë vendin.

Najib, ish-gjeneral brigade i ushtrisë siriane, drejtonte atëherë Degën e Sigurisë Politike në Daraa.

Ndryshe nga Assad, Najib ndodhej në gjykatë gjatë shpalljes së vendimit. Ai u shfaq brenda kafazit të të pandehurve, i veshur me uniformë burgu, ndërsa gjyqtari lexoi dënimin nën masa të forta sigurie.

Një proces historik për autoritetet e reja

Vendimi ndaj Assadit është i pari i këtij niveli nga autoritetet tranzitore siriane ndaj ish-udhëheqësit të vendit.

Gjatë këtij viti, autoritetet e reja kanë nisur procedime kundër disa prej zyrtarëve të regjimit të mëparshëm, si ndaj personave që ndodhen në Siri, ashtu edhe ndaj atyre që janë larguar nga vendi.

Proceset synojnë të trajtojnë përgjegjësinë për krimet e kryera gjatë sundimit të Assadit dhe gjatë konfliktit të gjatë civil.

Dënimi i Assadit me vdekje, megjithatë, përballet me një pengesë të madhe praktike: ai ndodhet në Rusi, çka e bën zbatimin e vendimit të varur nga mundësia që autoritetet siriane ta sigurojnë ekstradimin ose dorëzimin e tij.

Vendimi shënon një moment të rëndësishëm simbolik për viktimat e konfliktit sirian dhe përpjekjet e autoriteteve të reja për të ndjekur penalisht figurat kryesore të regjimit të rrëzuar.