56-vjeçari Ardian Muka është arrestuar në Vorë, pasi dyshohet se kërcënoi kushëririn e tij dhe familjarët për t’i marrë 300 mijë euro. Operacioni policor i koduar “Mesazhi” u finalizua pas kallëzimit të bërë nga shtetasi E. M., i cili njoftoi se në portën e banesës së tij, në fshatin Gërdec, kishte gjetur një fishek dhe një letër me përmbajtje kërcënuese për jetën e tij dhe familjarëve.

Sipas Policisë, specialistët e Komisariatit Nr. 7, në bashkëpunim me Seksionin për Hetimin e Krimeve të Rënda dhe nën drejtimin e Prokurorisë, identifikuan dhe arrestuan në flagrancë shtetasin A. M., 56 vjeç, banues në Vorë.

Nga hetimet dyshohet se ai, nëpërmjet kanosjes për jetën, i ka kërkuar kushëririt të tij, E. M., shumën prej 300 mijë eurosh, duke kërcënuar edhe familjarët e tij.

Gjatë kontrollit në banesën e 56-vjeçarit, policia gjeti dhe sekuestroi municion luftarak, veshjet e përdorura gjatë ngjarjes dhe një aparat celular, në cilësinë e provës materiale.

Njoftimi i plotë i Policisë së Shtetit 

“Kanosi kushëririn e tij dhe familjarët e tij, me qëllim për t’i marrë shumën prej 300 000 euro, arrestohet në flagrancë 56-vjeçari.

Sekuestrohen municion luftarak, veshjet e përdorura gjatë ngjarjes dhe një aparat celular.

Pas kallëzimit të bërë nga shtetasi E. M., se në portën e banesës së tij, në fshatin Gërdec, kishte gjetur një fishek dhe një letër me përmbajtje kërcënuese për jetën e tij dhe familjarëve, me qëllim për t’i dhënë shumën prej 300 000 eurosh, specialistët e Komisariatit të Policisë Nr. 7, në bashkëpunim me specialistët e Seksionit për Hetimin e Krimeve të Rënda nën drejtimin e Prokurorisë, organizuan dhe finalizuan operacionin policor të koduar “Mesazhi” me qëllim identifikimin e autorit dhe dokumentimin e rastit.

Në kuadër të operacionit u bë e mundur identifikimi dhe arrestimi i shtetasit A. M., 56 vjeç, banues në Vorë.

Ky shtetas, nëpërmjet kanosjes për jetën, ka kërkuar nga kushëriri i tij, shtetasi E. M., dhënien e shumës prej 300 000 eurosh, duke kanosur gjithashtu edhe familjarët e tij.

Gjatë kontrollit të banesës së tij u gjetën dhe u sekuestruan, në cilësinë e provës materiale, municion luftarak, veshjet e përdorura gjatë ngjarjes dhe 1 aparat celular.

Vijon puna për dokumentimin e plotë të rastit.

Materialet procedurale iu referuan Prokurorisë, për veprat penale “Shtrëngimi me anë të kanosjes për dhënien e pasurisë” dhe “Mbajtja pa leje dhe prodhimi i armëve, shpërthyese dhe municionit””