Ushtria izraelite goditi Libanin të mërkurën, duke synuar më shumë se 100 vende në vetëm 10 minuta në sulmet e saj më të mëdha të koordinuara që nga fillimi i luftës.

Ministria e Shëndetësisë e Libanit bëri të ditur se të paktën 182 persona janë vrarë dhe më shumë se 800 të plagosur.

Në vendin e sulmit më të madh ajror në Bejrut, punonjësit e emergjencës po kërkonin ndërtesat e dëmtuara për orë të tëra. Mes rrënojave u gjetën pamje të jetëve të ndërprera, fotografi të familjeve që buzëqeshnin, rroba, detyra shtëpie të shkollës që kishin mbetur të papërfunduara. Ishte e vështirë të besohej shkalla e shkatërrimit në një zonë kaq afër qendrës së kryeqytetit.

Abdelkader Mahfouz erdhi për të vizituar vëllain e tij i cili ishte plagosur në sulm.

“Kishte shumë pjesë trupi këtu. Vetëm njerëzit po lëndohen. Çfarë duhet të bëjnë njerëzit? Ne nuk mund të bëjmë asgjë. Do të doja të isha një bombë që të mund të hidhja në erë këdo që është përgjegjës për këtë. Armiku nuk ka mëshirë”, tha ai.

Shumë njerëz në Liban janë të zemëruar me Hezbollahun, duke thënë se e ka futur vendin në një luftë të padëshiruar. Por ata gjithashtu fajësojnë Izraelin për kaq shumë shkatërrime në këtë vend.

Hezbollahu thotë se ka të drejtë t’u përgjigjet sulmeve izraelite dhe ka qëlluar me raketa Izraelin verior, ndërsa vazhdon mosmarrëveshja nëse Libani është pjesë e armëpushimit.

Presidenti francez Emmanuel Macron kërkoi që armëpushimi 2 javor mes SHBA-së dhe Iranit të përfshijë edhe ndalimin e sulmeve të Izraelit ndaj Libanit.

“Armëpushimi në Lindjen e Mesme duhet të përfshijë Libanin që të jetë i besueshëm dhe i qëndrueshëm”, paralajmëroi presidenti francez Emmanuel Macron gjatë dy bisedave të ndara telefonike me presidentin e SHBA-së Donald Trump dhe presidentin iranian Massoud Pezeshkian.

Edhe Sekretari i Përgjithshëm i OKB-së, António Guterres dënon në mënyrë të prerë sulmet masive të Izraelit në të gjithë Libanin më 8 prill” dhe u bën thirrje “të gjitha palëve që të ndërpresin menjëherë armiqësitë”, thuhet në një deklaratë nga zëdhënësi i tij.