Udhëheqësi suprem i Iran, Mojtaba Khamenei, raportohet se ka rënë dakord të hyjë në negociata me Shtetet e Bashkuara, duke sinjalizuar një hap të mundshëm diplomatik mes konfliktit në vazhdim.

Sipas një raportimi të Al Arabiya, që citon media izraelite, lideri iranian ka dhënë dritën jeshile për bisedime me Uashingtonin me synim arritjen e një marrëveshjeje.

Zhvillimi vjen pasi presidenti amerikan Donald Trump deklaroi se tashmë janë zhvilluar kontakte mes Uashingtonit dhe Teheran, të cilat kanë prodhuar “pika të rëndësishme dakordësie”.

Duke folur për gazetarët, Trump tha se diskutimet janë mbajtur të dielën dhe pritet të vazhdojnë, duke rritur mundësinë për një marrëveshje të shpejtë për zgjidhjen e konfliktit.

Ai shtoi se në këto bisedime kanë marrë pjesë i dërguari i tij për Lindjen e Mesme, Steve Witkoff, si dhe dhëndri dhe bashkëpunëtori i tij i afërt, Jared Kushner.

Trump u shpreh gjithashtu se SHBA “po negociojnë me personin që ai e konsideron si liderin më të respektuar”, duke lënë të kuptohet për një kanal komunikimi në nivelet më të larta të udhëheqjes iraniane.

Megjithatë, versioni iranian është i ndryshëm. Agjencia Fars, duke cituar burime zyrtare, mohoi çdo kontakt të drejtpërdrejtë apo të tërthortë me SHBA, duke treguar për një hendek të madh në deklaratat publike të palëve.

Garda Revolucionare kërcënon Izraelin

Në një zhvillim paralel, IRGC akuzoi Izrael se po shfrytëzon situatën e luftës për të kryer “krime të gjera lufte ndaj civilëve” në Liban dhe në territoret palestineze.

Sipas agjencisë IRNA, Garda Revolucionare paralajmëroi se, nëse sulmet vazhdojnë, do të ndërmarrë “goditje të rënda me raketa dhe dronë” kundër forcave izraelite në veri të Izraelit dhe në zonat pranë Gazës, “pa asnjë përmbajtje”.

Situata mbetet e tensionuar, ndërsa sinjalet për negociata përplasen me retorikën e ashpër dhe kërcënimet ushtarake në terren.