Hamasi liroi trupat e dy pengjeve të tjera izraelite të martën, mes presionit në rritje nga Shtetet e Bashkuara për të shmangur një përshkallëzim që mund të prishë armëpushimin në Gaza.

Zyrtarët amerikanë, Steve Witkoff dhe Jared Kushner, i kanë kërkuar kryeministrit izraelit Benjamin Netanyahu të sigurojë që çdo përgjigje ndaj çdo shkeljeje të armëpushimit nga Hamasi të jetë proporcionale, për të shmangur prishjen e marrëveshjes.

Paralajmërimi vjen pas përleshjeve të dhunshme midis dy palëve në ditët e fundit. Izraeli goditi dhjetëra objektiva të Hamasit të dielën, pasi një sulm i Hamasit la të vdekur dy ushtarë izraelitë. Hamasi mohoi çdo përfshirje në sulm dhe tha se ai u krye nga një grup guerilas.

Presidenti i SHBA-së, Donald Trump, tha të hënën se Hamasi po shkelte armëpushimin dhe paralajmëroi se “ata do ta zgjidhin shumë shpejt nëse organizata nuk e rregullon vetë”. Ai tha gjithashtu se disa vende janë të gatshme të ndihmojnë në shkatërrimin e Hamasit nëse ai vazhdon të shkelë marrëveshjen.

Sipas Wall Street Journal, pas paralajmërimeve të presidentit amerikan, Hamasi u tha ndërmjetësve se do të ndalonte ekzekutimet publike të anëtarëve të bandave rivale, pas presionit nga Izraeli, duke argumentuar se veprime të tilla mund t’i jepnin Izraelit një pretekst për të vazhduar luftën.

Udhëheqësi i Hamasit, Khalil al-Hayya, përdori një ton diplomatik të hënën në një intervistë me një kanal shtetëror egjiptian, duke thënë se lufta kishte mbaruar dhe Hamasi ishte i përkushtuar për të kthyer të gjithë trupat e pengjeve të vdekur.

“Ne jemi të vendosur ta ruajmë këtë marrëveshje,” tha al-Hayya . “Do të zgjasë, sepse duam që të zgjasë.”