Policia Kombëtare Spanjolle ka arrestuar në Tarragona të Katalonjës 42-vjeçarin shqiptar Taulant Toma, i shpallur në kërkim nga drejtësia italiane dhe i njohur për arratisjet e përsëritura nga burgjet europiane.

Arrestimi i tij i ka dhënë fund disa muajve kërkime ndërkombëtare, pas arratisjes nga burgu i sigurisë së lartë në Opera, pranë Milanos, më 7 dhjetor 2025. Sipas burimeve hetimore, Toma ka bërë rezistencë gjatë momentit të arrestimit.

Toma konsiderohet nga autoritetet si një i dënuar me një histori të gjatë arratisjesh. Në dosjen e tij figurojnë katër arratisje nga institucionet penitenciare, tre në Itali dhe një në Belgjikë.

Si u arratis nga burgu i Operas Arratisja e fundit ndodhi në burgun e Operas, ku Toma po vuante një dënim që, sipas autoriteteve italiane, duhej të përfundonte në tetor 2048.

Sipas rindërtimit të hetuesve italianë, ai preu hekurat e dritares së qelisë dhe përdori çarçafë të lidhur me nyje për të zbritur nga godina. Më pas, ai arriti të largohej nga zona e burgut dhe të humbiste gjurmët.

Megjithatë, mbetet ende e paqartë se si arriti të kapërcente barrierat e jashtme të sigurisë dhe nëse kishte persona të tjerë që e prisnin jashtë perimetrit të burgut.

Pas arratisjes, autoritetet italiane aktivizuan një operacion të gjerë kërkimi, me postblloqe dhe kontrolle në zonën e Milanos. Toma, megjithatë, kishte arritur të largohej nga Italia dhe të kalonte kufirin.

Një emër i njohur për autoritetet italiane Për sistemin penitenciar italian, Taulant Toma nuk ishte një emër i panjohur. Në vitin 2013, ai u arratis nga burgu i Parmës së bashku me një tjetër të dënuar, në një tjetër incident që tërhoqi vëmendjen e autoriteteve.

Arratisja nga burgu i Operas riktheu në qendër të debatit sigurinë e institucioneve penitenciare në Itali. Gennarino De Fazio, sekretar i përgjithshëm i sindikatës së policisë së burgjeve UILPA, kishte ngritur shqetësime mbi mbipopullimin dhe mungesën e personelit.

Sipas deklaratave të tij, në atë periudhë burgu i Operas kishte një nivel mbipopullimi prej rreth 153%, me 1,338 të burgosur përballë një kapaciteti prej 918 vendesh, ndërsa numri i punonjësve të policisë së burgjeve ishte i pamjaftueshëm.

Pritet ekstradimi drejt Italisë Pas arrestimit në Tarragona, autoritetet spanjolle pritet të ndjekin procedurat ligjore për ekstradimin e Tomës drejt Italisë, ku ai duhet të përballet me drejtësinë për arratisjen e fundit dhe të vijojë vuajtjen e dënimit të mëparshëm.

Përveç pjesës së mbetur të dënimit deri në vitin 2048, ndaj tij pritet të zhvillohen procedura të tjera gjyqësore lidhur me arratisjen nga burgu i Operas.